"Awit"
Umaawit ang dagat.
Sumisipol sa pagitan
ng alon at hangin
Tangay nito'y paghuni
ng pagtatangi
at pagtingin.
Aking nauulinigan
kanyang marahang oyayi—
nag-iimbita
sa kagyat na paghinga,
kumakalabit
sa bawat tilamsik,
sa ritmo ng pagbasag,
pagtampisaw, at pagbalik.
Kung ang dagat ma'y tunay
na musikang sumasalimbay,
aking pagpaparaya
sa pagitan ng mga alon
ang malayang pagpatianod
mula baybayin
hanggang laot.
"Sayaw"
Sa kabundukan tayo
kinakausap ng mga tala,
kung saan natutulog
ang mga ilaw na lumalamon
sa kinang ng mga dalaga
—sumisilip sila sa kadiliman
sakaling ika'y
handang tumunghay
sa tahimik nilang pagsayaw.
Laan sa iyo
—ikaw, sa damuhan,
nakahilata.
Sa dagling pahinga
may pagtiim ang dilim,
nang hagkan ng Amihan
ang tumutunghay sa
namimintana.
Sapat ang ngiti ng mga tala
sa munting pagtatanghal,
sa magdamagang ginaw,
ginahawa.
"Tagpuan"
Sa milyong bituing
pinatitingkad ng dilim,
may isang nanatili
hanggang takip-silim
Sumayaw sa tempo
at bugso ng daluyong,
sa nakalulunod na ritmo,
urong-sulong ng alon
Subali't pahinga
ang bawat paglubog,
at ginhawa naman
ang bawat pag-ahon
Dahil sa dulo ng laot
kinatatagpo ang langit
ng iyong bugso
at ng aking pag-ibig.
***
Ito ay lahok sa Saranggola Blog Awards 2023
Cultural Center of the Philippines
